European Peace Project

Hüt, am 9. Mai 2025 – genau 80 Jahr nachem End vom zweite Weltchrieg, wo 60 Millione Mensche umcho sind, wovo 27 Millione Sowjetbürger gsi sind, erhebet mir, Bürger vo Europa eusi Stimm. Mir schämet eus für eusi Regierige und d’EU, wo nüd us dä Lehre vom 20. Jahrhundert glernt händ. D’EU, wo emal als Friedensprojekt golte hät, isch pervertiert worde und hät damit sin Wesenskern verrate. Mir, d’Bürger vo Europa, nemet hüt am 9. Mai, eusi eigene Gschick und eusi eigeni Gschicht id händ. Mir erchläret d’EU als gschiteret. Mir fanget mit Bürger-Diplomatie a und verweigeret eus em geplante Chrieg gege Russland. Mir erchänet d’Mitverantwortig vom „Weschte“, vo dä europäische Regierige und dä EU a dem Konflikt a.

Mir, d’Bürger vo Europa, tretet mit dem European Peace Projekt dä schamlose Hüchlerei und Lüge entgäge, wo hüt – am Europatag – a offiezielle Fäschter und in öffentliche Sender verbreitet werdet.

Mir strecket dä Bürger vo dä Ukranie und Russland d’Hand us. Ihr ghöret zur europäische Familie und mir sind überzügt, das mir gmeinsam es friedlichs Zämmelebe uf eusem Kontinent organisiere chönt. 

Mir händ d’Bilder vo dä Soldatefriedhöf vor dä Auge – vo Wolgograd über Riga bis Lothringe. Mir gsend diä frische Gräber, diä i dem sinnlose Chrieg i dä Ukraine und in Russland hinterlah worde sind. Während diä meischte EU-Regierige und Verantwortliche für dä Chrieg hätzed und verdränget, was Chrieg für d’Bevölkerig bedüdet, händ mir d’Lektion vom letschte Jahrhundert glernt: Europa heisst „Niä mäh Chrieg!“

Mir erinneret eus a di europäischi Ufbauleischtig vom letschte Jahrhundert und a d’Versprechige vo 1989 nachere friedliche Revolution. Mir forderet es europäisch-russisches Jugendwerk nachem Vorbild vom Dütsch-französische Jugendwerk vo 1963, dass d’Erbfindschaft zwüschet Dütschland und Frankriich beendet hät. Mir forderet es Endi vo dä Sanktione und dä Wiederufbau vo dä Nord Stream II-Pipeline. Mir weigeret eus, eusi Steuergelder für Rüschtig und Militarisierig z’verschwende, uf koschte vo Sozialstandards und Infrastruktur. Im Rahme vonere OSZE-Friedeskonferänz forderet mir d’Schaffig vonere europäische Sicherheitsarchitektur mit und nöd gege Russland, wiä i dä Charta vo Paris vo 1990 feschtgleit. Mir forderet es neutrales, vo dä USA emanzipiertes Europa, das e vermitelndi Rolle inere multipolare Wält inimmt. Euses Europa isch post-kolonial und post-imperial.

Mir, d’Bürger vo Europa, erchläret dä Chrieg hiermit für beändet. Mir machet bi däne Chriegsspiel nüme mit. Mir machet us eusne Manne und Söhn kei Soldate und us eusne Töchter kei Chrankeschwöschtere im Lazarett und us eusne Länder kei Schlachtfelder.

Mir büdet a, sofort en Abordnig vo europäische Bürger nach Kiew und Moskau z’schicke, um dä Dialog azfange. Mir werdet nöd länger zueluege, wiä eusi Zuekunft und diä vo eusne Chinder ufem Altar vo Machtpolitik g’opferet wird. 

Es lebi Europa, es lebi dä Friede, es lebi d‘Freiheit