European Peace Project

Dźensa, dnja 9. meje 2025 – dokładnje 80 lět po kóncu Druheje swětoweje wójny, kotraž płaćeše 60 milionow ludźi žiwjenje, mjez nimi 27 milionow sowjetskich wobydlerjow, pozběhnjemy, wobydlerki a wobydlerjo Europy, naše hłosy! Hańbujemy so za naše knježerstwa a EU, kotrež njejsu wučby z 20. lětstotka sćahnyli. EU, něhdy jako měrowy projekt myslena, bu perwertěrowana a je z tym jadro bytosće Europy přeradźiła! My, wobydlerjo Europy, tohodla dźensa, 9. meje, swój dóńt a swoje stawizny sami do rukow bjerjemy. Wozjewjamy EU jako zwrěšćenu. Započinamy z diplomatiju wobydlerjow a zapowědźimy so planowanej wójnje přećiwo Ruskej! Připóznawamy sobuzamołwitosć „zapada“, europskich knježerstwow a EU na tutym konflikće.

My, wobydlerjo Europy, stupimy z European Peace Project njehańbićiwemu ludarstwu a łžam napřećo, kotrež so dźensa – na Europskim dnju – na oficialnych swjedźenskich aktach a w zjawnych sćelakach rozšěrja.

Wupřestrěwamy wobydlerkam a wobydlerjam Ukrainy a Ruskeje ruku. Wy słušeće k europskej swójbje, a smy přeswědčeni, zo móžemy zhromadnje měrliwe zhromadne žiwjenje na našim kontinenće organizować.

Mamy wobrazy wojerskich pohrjebnišćow před wočomaj – wot Wolgograda přez Rigu hač do Lothringena. Widźimy čerstwe rowy, kotrež je tuta bjezzmysłowa wójna w Ukrainje a w Ruskej zawostajiła. Mjeztym zo wjetšina knježerstwow EU a zamołwitych za wójnu šćuwa a wutłóčuje, što wójna za ludnosć woznamjenja, smy wuknyli lekciju zašłeho lětstotka: Europa rěka „Ženje wjace wójna!“

Dopominamy so na europske natwarne wukony zašłeho lětstotka a na přilubjenja 1989 po měrliwej rewoluciji. Žadamy sej europsko-ruski młodźinski skutk po přikładźe němsko-francoskeho młodźinskeho skutka wot 1963, kotryž je „njepřećelstwo namrěwstwa“ mjez Němskej a Francoskej zakónčiło. Žadamy sej kónc sankcijow a znowanatwar Nord Stream II-pipeliny. Spjećujemy so, naše dawkowe pjenjezy za brónjenje a militarizowanje brojić, na kóšty socialnych standardow a infrastruktury. We wobłuku měroweje konferency OSZE žadamy sej wutworjenje europskeje wěstotneje architektury zhromadnje z a nic přećiwo Ruskej, kaž w charće Parisa wot 1990 postajene. Žadamy sej neutralnu, wot USA emancipowanu Europu, kotraž posrědkowacu rólu w multipolarnym swěće zabjerje. Naša Europa je post-kolonialna a post-imperialna.

My, wobydlerjo Europy, wozjewjamy tutu wójnu z tym jako skónčenu! My nječinimy we wójnskich hrach sobu. My nječinimy z našich muži a synow žanych wojakow, z našich dźowkow žane sotry w lacareće a z našich krajow žane bitwišća.

Poskićamy, hnydom delegaciju europskich wobydlerkow a wobydlerjow do Kijewa a Moskwy pósłać, zo bychmy dialog zahajili. Njebudźemy dlěje přihladować, kak so naš přichod a tón našich dźěći na wołtarju mócnarskeje politiki wopruje.

Njech je žiwa Europa, njech je žiwy měr, njech je žiwa swoboda.